الرئيسية
راح أحجيلكم حياة الرجال من يتزوج
يكعد المكرود الرجال ساعة بالـ 8 الصبح بعد ما يسمع المنبه ككووومممم أأأأككككككعععددددد (12 ميكا ريختر)يفز المكرود و يمكز كمزة ما صايرة في تاريخ اولومبياد مقاديشو و يلكة نفسه حاضن البنكة لأنه لكل فعل رد فعل بكده في المقدار و يشلغم عليه في الاتجاه
المهم يفوت المسكين للحمام يلكة مرته مخلصة المي و كالبه نانسي عجرم و غاسلة الهدوم كلها بالطشت وكله حبيبي قرّب بص و بص بص شامبو و ليفة الغسلة بالف و نص نص و من هالسوالف المهم يفتح البوري المكموع يلكة الداونلود مال البوري (344 بايت) و اخر شي يطلعله
المهم ...
يطلع من الحمام و وجه كلة معجون حلاقة تكول بابا نؤيل عتيك ولابس بجامة (بازة مشتريهة من شارع سهام العبيدي )و يكعد يستهدي برحمانه و هناك تكفخ خشمة بجنون ساحق السيحة مال الراحبة ...العفو قصدي الريحة مال الساحبة أي المهم و يكتشف انه الليدي مرته حاركة البيض بدرجة ناعلة سلفى سلفاه تطلع المرة ذابة البيض عالتيفال و فالتة تسوي ألو على ام خضير بمناسبة فوز شذى حسون .. يا شذى حسون شكد قديمة بس همة ما مصدكين بيهة .. بس فوز المنتخب جيف زلم ما يجيبون طاريهم !!!
المهم....
يطلع المكموع كرصة خبز صارلهة أيام تلوب بالفريز بحيث صايرة مومياء مو خبزة و يعلسهة بأستكان جاي و يولي يبدل
اولاً -- ناسية الخاتون تخيط جواريبه اصابع طالعة من الجواريب تكول كولجي و يصد برجله
ثانياً -- حاطة الشيسوار بصف الصوبة الكهربائية بحيث محروك و كام يطلع فسفس مو هوة !!
ثالثاً -- تكرمون الحذاء شامرته بالغلط بالغسالة صاير مقلم اسود و ابيض بسبب التايد (حذاء قديم) فالمكموع عصره و شره عالحبل دينتظر الطركاعة العفو قصدي الطركة تنشف عالشمس (على حظه المبنجر جانت مغيمة و مطر لبسه منكع تكول لابس اسفنجة مو حذاء)
يطلع المسكين يصفك الباب وراه طرااااااخ (هيج من الدنيا هيج من مرتي هيج .. كافي افتهمنا صاير عصبي ..كادر بس عالباب ابو اللكو)
و يرجع العصر يدك ساعة مثل اليتيم محد يفتحله (محد لو كلية؟نيااا)تطلع الخاتون نايمة و الاخ كاعد ياخذ لوبات بالطرمة تكول ديكتشفها اول مرة
يدخل يلكة خبرين واحد زين وهو انه الجدورة كلها فوك الطباخ (طباخ 5 عيون علمود الحسد) و الخبر الموزين انه الجدورة نافظين الاكل و تاركيله اخلص الامنيات بالسعادة و الموفقية (ادري الموفقية اتعمر معدة اتشبع بطن!!!) يتدعبل الرجال و يتدهدر مثل قبغ الجدر الى اقرب منتجع فلافلي مع ملحقاته عمبة وزلاطة و يعلسله 4 لفات فلافل بحيث مو بس يشبع يسكر و يكوم يشوف الواحد ازدحام
اما بالليل فيستمع الى نشرة الاخبار و الحصاد وهي :
وديني يم أهلي
اريد ليفة حجم عائلي
ابنك راح ينحرف ديلعب دعابل لازم اتشوفله جارة (حلوة مال ينحرف..شنو العفو تاتا ماشي بسرعة و راح ينكلب !!)
ابنك الصغير يحب بنت الجيران احجي وياه (وج يا بت الجيران عمره 44 يوم اصبع رجله الجبير ما يندله هالمرة بت الجيران)؟؟؟؟
ترجع اتكله ماطول ماكو كهرباء الغيلنة الميزانية؟؟
لو تكلبها بيت مال دجاج و نجيب فد 20 دجاجة انربيهة مو احسن؟؟ بيض و احتمال اذا نوعية زينة اتذب كيمر و من السوالف ,,,,,المسكين تفتر الدنيا براسه تكول مرجوحة 6 سليندر و يبدي يفكر يقدم بال un لجوء لموزمبيق حتى يخلص منها و من سوالفهة ذات الدمار الشامل
__________________
